2007年5月15日

1977年"南慈雲山"總站 (轉載)

轉載自"hkitalk"網站




30年前既一張黑白相, 呢張當然我唔我拍攝喇, 而係我阿爸係1977年所影的.

呢個係「南慈雲山」總站。 雙層巴Daimler C型行5C,單層Albion行2F。 個總站長年都未用盡,坑多線少,所以後來左右兩邊陸續有部份車坑收番,改做公園同停車場。 對面幢公屋就係慈雲山66座(民俊樓),每層過百戶,係少有採用三位數房號o既幾幢公屋之一,現已重建為慈康邨。

好難想像一層公屋可以有過百戶…

試諗o下拆o左一幢民俊樓,幅地夠起足足有五幢樓o既慈康邨,座樓會有幾長,可以有幾多個單位!

不如將成條村d樓打通變一座丫好唔好… 都唔明起咁大座做乜鬼?

最為人熟識一層過百戶既公屋,應該係好多巴士線經過既東頭村23座!

好似藍田北 ... 但係睇睇下藍田一座唔係呢款

我都同你一樣好覺呢度似藍田北.我無留意0的公屋款式,真係隋時估錯.

慈雲山66座基本上係將兩座五型徙廈頭尾連接在一起,咁就可以節省一條樓梯,(如果分開建兩座樓既末端都要建梯樓)而其中一個電梯大堂亦可以用較少型規格(即牛下第九座兩個電梯大堂一大細咁)。咁起既原因除左係為左遷就地型外相信係因為節省建設這些公用設施既成本。

不過咁大型相通既大廈缺點就係引起保安問題,假設有賊人入去犯案後會較易逃走或躲藏,牛頭角下村(二區)亦面對同樣問題。

反而最近鏡0個部旅遊巴係米Ford R1011再早期0的0個款Ford R192.睇條鈴同度門0係前軸前,差唔多有90%似係...

是。 圖中亞比安位置即是現在那所教會 / 建築物 / 露天停車場
鐵絲網內是現時慈雲山道側之公園。 前5c坑(現公園仔) 即圖中最左位置。 改建時是將最接近慈雲山道的那數條坑封閉。 好耐無上慈雲山,唔知變成點喇。

哇~~就咁數都數到有8條車坑... 我想問呢個總站最高峰有幾多條線晌度做總站呢?

應該係九條坑。由右邊數起,Albion停第三坑,Daimler C停第六坑,左邊再有三條吉坑。

3C,5C,2F(唔記得有冇呢個組合), 5C,3M,2F:呢個就肯定有~ 現時肯定係最少線用啦...3P+3D特別車.

圖片中丹拿C前面是一部退伇的白水箱用來做站長室.

當年 2F 仍然全程行龍翔道往南昌街時 (即不經富美街) 是用呢款亞比安的。 不過,我估計呢幅相可能早過 1977 年。

我都估計係早於1977年,因為丹拿C型好多已改為一人控制.

想不到以前慈雲山(南)巴總係咁大但冷清,記得以前的慈雲山(北)巴總都是相當大,規模比圖中慈南巴總仲大少少,巴士線數目當然比慈南豐富得多啦。

當年慈北個巴總真係幾大吓, 不過同時線亦都好鬼死多.

現時呢個慈北巴總已經縮哂水lu, 所以好多當時以慈北做總站嘅線都冇搬番上去(e.g.3B,3D...)

講開慈雲山(北),重建前的坑位如下。慈雲山道 [] 3C | 116 | 3D | 15A | 3B | 吉 | 山邊

3B 和吉坑只可以一部車, 1980's 才在 3C 坑旁加多條坑畀 3M。

3C喺總站重建後都係泊番入口第二條坑bo.

面積上舊慈雲山(北)總站是細過舊慈雲山(南)。

仲有3A同3M呢, 所以全盛時應該係咁, 3M | 3C | 116 | 3D | 15A | 3B
而 3A 係冇坑, 泊係近出口.

講起每層過百戶的公屋,唔知美東村美東樓每層有無超過100戶呢?美東樓聽聞係''全港最長''公屋樓宇,由頭到尾有250米長,睇落去棟樓都相當大,但唔清楚每層有無過百戶。

當時慈雲山好多暴力事件發生風氣亦不好, 更甚父母唔比子女識住慈雲山既人.

當日仲有慈雲山61,65庭都係過百戶既公屋, 不過唔知與慈雲山66座同一STYLE的秀茂坪26,27座係唔係一層過百戶.

秀茂坪26/27座好似係相連但冇打通,每層樓應該不過百戶。

係相連冇打通定係相連打通但單位號數分開計? 其實現時仍健在既牛頭角下村8~12座及黃竹坑村1~8座(低層)都可以叫一層過百戶,不過係分開左座數同埋單位號數分開計咁解。

細個阿爸帶我上北慈,站長/司機們用大水箱養了一缸錦鯉~ 中巴的ML、3D的S3M、3A的鴨、以為命運同3A差唔多的3B(結果一死一生)、15A的DM......到我返中學,初期還可以見到朝早有中巴雞同寶行116,現在,只是清一色的10xx。

中巴既打仗車真係乜都有, 當年601正常派DL+LA, 每朝早都有超過十部中巴停O係中秀, LF ML都有, 而家得3種10 30 50 。

2 則留言:

  1. 匿名6/04/2007

    看到這張七十年代的照片,有點想哭。It is so nolstagic! 那是協和書院對開、66座下面的巴士站哩! 真的勾起了很多童年回憶。日子過得真快。網主,謝謝您,希望再加油,多貼一些昔日的照片!

    回覆刪除
  2. 多謝鼓勵!

    當天在網上找到這些資料,心情亦很興奮和感動!我只希望這些回憶不會隨年齡增長而忘記。

    回覆刪除