有冇人以前讀過慈雲山五邑鄧樹椿小學? (轉載)

轉載自: http://www.uwants.com/viewthread.php?tid=6013015

花名係五粒豆豉椿,有冇人有相呀?好想睇番~~~

me! 1978~1983

樓上的慈雲山街坊,你們住第幾座的?

me too, graduated in 1980, lived in blk 22

你住幾楼呀!我雖然系住20座,但我很多朋友在二楼住,所以經常在二楼的騎楼玩!

Who are you? 你竟然知道我同陳麗賢d秘密,咁你邊一年同過我一班架,又識得朱仔(朱民光),我地嗰陣時都好friend,又住係隔離座,其實幅相裡面好多都好friend, 大部份d名我都記得...係喎,你都幾好記性,連呀"連潔湄"係插班生都記得,好嘢,果然有五邑學生既風範,讀書唔見你咁叻,d無謂嘢就記得清清楚楚...哈哈

成日同陳麗賢/陳燕玲(細妹)/羅麗絹/黃麗萍跳繩, 無幾多個嫁. 唉! 我呢類係唔起眼, 你應該無印象喇! 由底數上去等2排左手面第一個呀!記唔記得?

我梗係記得你喇,你嗰時高高瘦瘦架ma, 最鐘意跳繩, 不過你份人較為低調, 所以我先唔記得你個名啫, 但我記得你係住喺22座, right, 你都記錯羅麗芳做羅麗絹啦 , 咁你係咪叫何XX呀

師兄,22座都係8層高喎!細個有冇試過夜晚唔敢去厠所呀? 要去中間樓梯果種呀!住係d有15層高果種就冇我地咁慘啦! 唔知邊條友設計ga,屋企冇厠所都夠膽死.....

樓上的仁兄,不會不知這是什麼地方吧?!

嘩!呢幅圖見到母校,郵局,14,15,16,18及緊緊望到ge24座

24座兄弟, of course試過夜晚唔願去厠所(but cannot). I had to acomplish my younger sister to toilet too.

我住15座....你地講果d廁所我都有d印象~ 成層o既廁所都集中晒果度...勁多雜物

諗左好耐....終於記得番呢度係邊度!

如果有多d呢d相睇番就好喇....果時都唔係個個有相機~

呢道好近學校架wor!冇理由要諗好耐!

第一次睇到第二張相....勁熟~~~之後睇埋第一張....完全番晒黎,條大斜路....小童羣揪會,另一邊去萬年, 24座我細個成日都去...不過唔記得去做咩
或者俾人講一講又記得番, 可能去打乒乓波... 細個好鍾意去16座果幾張石台度打,同埋"猜台", 猜贏叫人"留波留板留底褲"

我係8座時時上16座可枱打波既戰友.....我係大眼仔...

I studies from 1978 to 1981. Missed my Ah Sir so much !!!

我係五邑讀果時係1986-1993年   
以前都係住係30座ga~ 唔知有冇其他師兄以前都全係30座呢?
細細果成日係30座後面既公園同中央”波地”玩,成日去30座後面既鈄坡爬來爬去又玩草同”四驅車”.....勁開心!

為什麼只限 五邑? 保良四小, 孔仙洲中學又會不會受歡迎?

佛教"捅賓州"唔係係彩虹既咩????

我都係1986年讀小一架喎! 乜唔係1991-1992左右拆咩?點解1993你仲係到既?

呀!係喎~ 白痴左...... 我由小五開始去左基慈小學lu..... 好記得最後拆校既時候......班入面只有8個同學.....我仲考第二!! 哈哈哈!!!! 咁上面果位師兄讀邊班ga? 我讀1D班~

五邑拆校時,我都曾經報考過聖文德.....但係考唔到! 哈哈哈!

我都係慈雲山長大,常常懷念從前的慈雲山,成日都會夢回那時的慈雲山。 我以前住第十座,讀五粒豆士春(五邑鄧樹椿)上午班,83年先畢業。
鄧樹椿o既校長係黃河清, 我o既班主任係黃紀珍先生 (1B,2B,3B) 王佩琳先生 (4A) 譚道鈞先生 (5A,6A)

有無畢業相呀~同班同學!

一至六年級都係A班...... 亦係83年畢業...班主任係譚道均.... 我曾比佢用乒乓球板打手板....... 記得佢成日孭住個手抽袋行....... 我住16座的~
我d相搬屋時無哂~ 成積表記得係白卡紙做的~ 我亦做過風紀~ 同班中有個肥同學叫楊家歡!其他有.......鄭少雄..陳志亮..譚 x 東..鄒玉玲..

譚 x 東=譚肇東、仲有楊元邦、簡愛玲、黃偉芯、龔康武、林玉蓮、陳志龍...仲有...如果有相我會記得多D。

咁我咪同你係同班同學..... 真係咁都撞得番..... 你講果幾位我都有印像, 譚肇東住 16座(好似1樓定2樓)望 17座近聖文德, 黃偉芯就黑皮膚... 龔康武就細細粒... 陳志龍就有孖兄弟.....屋企(唔記得邊座)兩個單位打通.... 仲有個插班生....鄒玉玲, 你仲未講你姓乜喎

遲D先話過你知,你呢?有セhints呀!我又記多幾位同學的名了,謝燕玲、余 x 華、陸美斯、鄺愛華、譚偉德、關仲明...仲有...再記下先。如有錯漏,請補充,Thanks!

你都記得好多個喎............... 係咪有本紀念冊呀~我都記得幫好多個簽......一寸光陰一寸金寸就比人打獲金.....
我仲記得有...住尖沙咀的鄭安國..... 謝燕玲就係智商有問題果個......成日比人蝦, 你有無我地班相 post 黎睇下先...... hints~我係男生!

咁你一係楊元邦,一係鄭少雄。

錯了! 我無楊元邦咁叻去男拔讀書....亦無鄭少雄咁大份.... 有無畢業相先...有就 post 黎話你知

摷緊,仲未搵到。搵到post 上o黎。不過我大約估到你係邊個。

咁就等你消息

剛剛發現facebook起左幾個有關group,最多members就係呢個,值得去睇睇同加入五邑鄧樹椿小學
http://www.facebook.com/profile.php?id=808324405&ref=profile#/group.php?gid=16815654095&ref=mf

完全忘記阿sir miss 個名....... 只知道以前我畫畫好靚....d miss "請"左我去教員室畫畫俾佢地....... 都唔知道究竟係罰我定係讚我......哈哈!

嗰個好似姓黃的女老師.個子好細.帶個眼鏡.我都比佢打過幾巴.耳光.而家重記得那時個耳仔哇哇作響,但而就變成懷念啦.

有無人係 77年 - 83年上午班架?

我唔係好記得...唔記得係1A定1B,我淨係記得係有個花名叫"朱PIG"既MISS做班主任......

如果我無記錯,佢打人應該打得好勁。當眾扭耳仔扭到喊果隻呢。

係呀係呀!! 好變態........ 有一次仲扭到耳仔邊出血...... 果個係我......哈哈! 又試過打手板.......打到標眼水........

你地講"朱pig"?

係呀~~

我曾經目睹過類似事件發生在操場上(於早會中),莫非果個就係... 你講開又講,我地個操場其實只係一個公共籃球場,隔離仲有一個小型遊樂場,我地成日都果度玩兵捉賊。小息時就隔住個鐵絲網買炸魚蛋。上堂時成日望住 15/16 座發白日夢,睇下d 師奶收衫。

!! .....你居然目擊案發過程?! 果日但係係操場門口附近俾"朱pig"扭到出血........仲有勁多人睇到眼突........仲記得我讀小一既時候....小息時就成日有2個小六既姐姐撩我玩......我仲記得其中一個姐姐都幾靚女下.....嘿嘿....好可惜當時我太純情太怕醜.......結果驚左佢地冇同佢地玩......哈哈

嘩!你地兩個真係有緣喎!咁你五年班讀咩班架?我地其實會唔會同班?

......我小五就去左基慈讀書lu~ 小四後期只有每班8~15人左右.....好凄涼既感覺.......

點解你靜係問五年班咁奇怪? 係咪想搵返某個失散左同學呀? 我係 77年 - 83年上午班架
讀:
1B (班主任:黃紀珍)
2B (班主任:黃紀珍)
3B (班主任:黃紀珍)
4A (班主任:王佩琳)
5A (班主任:譚道鈞)
6A (班主任:譚道鈞)

唔係啦!因為我記得五年班係最後一年係呢間學校,咁所以應該會印象深刻d掛...因為我淨係記得我讀5B,好似係溫倩青做班主任...不過唔記得佢係米呢個名...我都記得個時成班好似得十個都無... oh..咁你係我ching woo... 譚道鈞係米即係教英文既譚sir?

係呀!我係最後一屆..仲唔可以係到畢業, 個年應該係1990-1991左右.....

miss 溫好熟......係咪矮矮地.....個樣都算ok ga? 希望我冇記錯啦.......因為就係佢捉左我去教員室畫畫果個喇~~

溫生佢係矮矮地肥肥地帶眼鏡既c9...但佢好似係教中文架噃...

..........咁我肯定係認錯左人啦!~XD

哈哈.三十年後重有人提起.我是1971-1977.住59座.校址,点去都记吾得啦! 校长黄河清.

我耐唔耐都會發夢回到慈雲山或者五邑鄧樹椿, 學校裏面個間隔我仲好記得。每層嘅盡頭都有一度大鐵門通去15座。

我都係成日發夢呀...我住十五座架!!! 我唔記得自己幾多年畢業.....要諗番淨係記得拆果陣轉左去聖文德讀小五&六, 我冇你地咁好記性...唔記得miss d名~我post d相上黎大家幫手認吓啦!!!

Miss用英文字母大家易分d~ 幫我記吓佢地叫咩名? 教咩科?? 同埋有咩特徵???
睇番我先知自己係讀1A架, A+B果張係去旅行,冇記錯的話地點應該係彭福公園, Miss B把聲成日都沙沙地(唔記得咩原因),所以佢成日都要拎住個手袋形mic+喇叭,記得佢個人幾好幾錫d學生,唔會點鬧人~ Miss D記得好似係我最後一個班主任,02果張相見到後門個門牌同埋隔離綠色o既牆,細個成日對住呢度牆練射波....真係懷念死人呢!!!










好犀利喎 搵得返d相 , 我地每年都會係大門口、及操場正中各影一幅相,等我都睇下搵唔搵得返先, Miss A 有d似我以前班主任”黃紀珍老師”,不過唔敢肯定.

原來我同你係同班同學.....
miss a --> miss 朱
miss b --> 好似姓龍..不過真係唔sure
miss c --> miss 賴
miss d --> miss 溫
不過佢地全名唔記得...

你地原來係隔離班ga? 我下次post我果班既相上去先!

應該係同班....

haha...你都有同一張相??? 同班同學你好呀!!! 有相就post d上黎睇吓啦.....齋風景都冇所謂~ 以前响慈雲山長大o既日子....實在冇幾多張相影過~ 記唔記得學校側邊有間洋服舖???

haha~我都有好多相呀!但係無scan到... 我記得學校對面有間洋服舖...唔通你同個間洋服舖有關既?如無意外,一至四年班都係同你一班..因為你post d相,我全部都好似有...

ha.....係呀,間洋服舖係我老豆開架~ 而我都係响果度長大~ d屋村feel好正!!! 學校咪有度閘連接住十五座o既? 記唔記得幾時會開架? 打風落雨???

操場隔離咪有個遊樂場o既....有條好高o既sir滑梯(而家d越建越矮)....兩邊有得sir,中間有條橋連住初初係石屎地, 後尾因為我隔離過幾間鋪有個細路仔响條橋度跌左落黎整親個頭, 所以先加左d車呔墊~ 中秋節仲有好多小朋友响果兩個滑梯口度煲蠟~

haha~我知你係邊個!hehe~ 你一放學會攞張凳仔坐係個到架嘛?

.....係咩?我果時咁乖架咩? 不過我唔知你係邊個....~~~~~~~~唔公平, 以我記得o既同學名有兩個... 當時同我差唔多高又friend o既"張X娟"
同埋成日黎我鋪頭玩我阿媽又識得佢嫲嫲o既"羅X珊"

點解你d fd兩個都係女仔?你係女仔黎架?如果係我諗我估錯左lu~

我係男仔...咁o岩我記得果兩個都係女仔o者~

aha~ 但你講個2個名,我反而無咩印象...

你當時係高果排定係矮果排先???

你地能夠相認,實在好難得

係呀!真係無諗過可以搵返失散左十幾年既小學同學仔...

很感人啊! 來個擁抱吧~ 哈XD

哈哈,冇可能估到

仲有冇大家o既陳年舊相睇啊???

我都係讀五邑鄧樹椿小學, 83年畢業, 上午班, 我記得有個同學隻左手handicap, 但打Pang Pong 波好勁...

AHAHAAHAHA~~~ 我知你係邊個已經ok啦!相我有大把但無scan...同埋要搵....

Hello palyau, 我都係上午班, 83年畢業架喎。你讀邊一班呢?

Hi madryan, 我讀6B, 本來我想Post我張成績表同大家分享, 但個file太大, 唔比我post...

係呢, 你仲記唔記得放學果陣門口會有勁多零食檔係15座地下, 咁賣d咩食你記唔記得ar, 等我講先la, 有我最鍾意食既炸魚蛋, 但要即食, 如果唔係縮水, so good, 仲有菠蘿冰水, 斎水兩毫, 有菠蘿五毫, 大菜羔勁加奶, 士多裡面d啫喱都好食, 雖然用黃頁兜住, so good, 仲有炸雞脾, 7毫子隻小, 個半一隻大, 驚唔驚呀...so good, 總之諗起就超回味喇...

我都係83年畢業wor,可惜下午班! 有冇記錯呀!咁跨,7毫子1隻雞脾? 我就鍾意食白色果d魚旦,好似5毫子1小袋,落勁多甜醬, 果隻所謂ge魚旦,好似絕左種咁,近呢十幾二十年都未見過, 如果有同學仔知道邊到重有得賣,請告知,定必感激萭分!!

好軟果隻呀ma,新年時節黃大仙地鐵站都仲有擺檔。

我係讀6A, 班主任係譚道鈞

我都鍾意食既炸魚蛋,要炸到好似乒乓波咁。仲有果檔炒面,朝早好多人幫趁。當然唔小得中間檔車仔面啦

你仲有無留果時D班相呀

hi 各位五邑仔, 你講嗰隻白色炸旦我叫'美味魚球', 宜家好小見, 以前住係21座逢新年樓下先有,後尾係黃大仙小巴站有個女人成面油推住架方形不銹鋼車仔兜住成兜黑油,裡面就係炸緊我地最鍾意既'魚球'喇,超正,無敵正,不過就唔係五毫子一袋,係五蚊一小袋,so bad...唉!有冇人可以俾番以前d野我呀,咩豬潤麯,加央多,食過24座鐵皮屋'紅記'西多士加紅豆冰先同我講喇,呀...唔知亞紅叔,紅嫂宜家係邊呢,so good...

紅記的餐旦福麵仍然令我回味無窮呢! 佢後面有檔賣上海麵的, 果時好似$5碗度, 真係好食到不得了, 至今仍搵唔番果種味道

我都有食過所謂o既"美味魚球",果個女人都冇乜點變...新年又可以去撞吓佢~ 自從慈雲山重建之後...唯一冇咩點變o既,我諗應該係大球場,慈雲閣,觀音廟同埋果度一層層o既斜坡(護土牆,慈愛巴士總站後面),以前好多人响果度曬衫,而家都係! 俾d相大家睇吓...新果d係近排影的~

有冇再舊d既相呀,好想睇呀...

喂,madryan,我記得我有d五邑既相喎,不過要摷,摷到同大家分享...

That's very great! Wait you. Thanks

palyau, 摷到d相未呀?

摷到喇,認得冇呀...


勁呀! 我認得你個女班長,我曾經同過佢一班,但我已經唔記得佢個名。我都認得你個班主任個樣。你呢? 邊個係你呀!

hi, 我是83年畢業上午6B的同學, 你說是女班長是否叫"連潔湄"?

佢叫咩名我已經唔記得。如果你是83年上午班畢業,我地應該係同年喎。我讀過1B、2B、3B、4A、5A、6A,有無同你同過班呀?

班長是連潔湄, 佢是插班生, 有段時間我同佢好friend . 我係1-6年都是B班, 所以我o地應該1-3年級是同班, 我估我知道"palyau"是誰. 但你就估不到, 你有無1-3年的校照, 我在搬屋時全部無晒!

班相仲搵緊,未搵到。 1-3B係黃紀珍先生做班主任,我記得同學有葉麗儀、吳紹惠、李溢林、楊偉鵬(孖仔)、林玉蓮、黃志強、許偉玲....

單是姓名真是比較難聯想 我都係見到palyau的6B結業相才回想起他們的名字, 真是很心急想看看1-3B的相! 你記不記得有個男同學仔叫"朱仔", 因佢當年同我阿哥都幾friend, 還有他皮膚白裡透紅很靚 , 所以對佢印象特別深. 即是最尾嗰排左邊數起的第三個.



幅相比較蒙,好難睇清楚,"朱仔"我就認唔出。相內圈住的幾位我就記得同佢地同過班。



在palyau右手邊就是朱仔啦. 應該2B是同我哋同班. 另一排圈住的男仔叫吳廷光, 下面靠近中間個女仔, 我有和她跳過繩, 但忘記佢個名, 而靠近miss圈住的叫陳麗賢, 我同佢幾friend, 以前啲人成日話palyau係佢老公仔, 重記得有次在佢屋企樓下大叫"陳麗賢,你老公仔來了, 你快啲出來", 連佢阿媽都嚇到O晒嘴.
你摷到1-3B啲相未呀?

有冇搞錯呀?大家都係83年畢業, 你地上午班d相彩色,我地就黑白, 唔公平呀!我要返去追討......
不過你班女同學都幾標緻,我個班就..... 等我又摷下同你地分享先

喂, madryan, 你話認得個女班長如果係中間個, 咁我同過你一班, 因為佢同我1至6年班都係同一班. 至於我咪企後排塊面花晒啊個囉, 以前興畫花晒人地塊面家麻.哈哈...

喂, 24座同學, 無理由黑白個喎, 你會唔會搞錯左你其實係73年畢業, 哈哈...喂, 你住24座應該食過'紅記'喇, 係咪超正呀...

我認得係由右邊數起第三個,至於中間個,我唔係好SURE,佢係咪姓鄭架?

hihi... 哈哈,今日興起就google一下我o既小學...就比我搵o到你地呢個post... 都太耐喇,好多野都唔記得lu...不過睇睇o下你地寫d野同d相, 又out起我d回憶...好懷念以前果d日子... 推算一下,我83年離開左香港.... 我應該82年畢業.. 記憶中係上午, C ?? 住40座....

拿; 冇吹水架! 我真係83年畢業架! 張相真系黑白架! 我冇scanner, 唯有用電話影啦.





真係喎,個背景同上午校完全唔同噃!

嘩,濛到爆,不過我認得背景係15座,very nice...

中間嗰個姓郭,右三啁個姓陳,yeah...

嗯....太好了~ 好歡迎你search到黎呢度呀!!! 慈雲山友!!! 轉貼一張聖文德小學、13&16座 o既相, 好懷念聖文德小學隔離果間士多同埋果d熟食鋪頭....有好多零食,又有潛紙仔....楂住幾蚊有得食又有得玩~

有冇再舊d既相呀,好想睇呀!

育才成廣廈 xx樂橋居, 之後唔記得左.

好似冇唱過首校歌咁.......無乜印象

細個果時都成日去13座度蒲.. 以我記憶中,好多時o的小食都o係隔住鐵絲網交易.. 得閑又走去米鋪后面"liu"機...記得有次有個女同學o係班主任前篤我出黎... 我都好似有o的舊相..得閑等我摷摷..

你講野我全部都有做過(除左俾女同學篤出黎之外), 如果有舊相,快D摷下啦。搬過兩次屋,D珍貴相唔知去晒邊,摷唔返,真係好可惜呀!
至於校歌,我從來都未唱過喎,係咪真係有架?

等緊你o既相啊!!! 係呀,13座係必蒲....仲有o個個球場+公園,球場入口有檔好細檔炸野係勁好味,記得好似係個矮女人响度炸,炸雲吞=一塊四方形o既炸麵粉上面有少少魚肉同埋炸番薯餅都勁正~

唔好講喇,口水都流曬喇....重有一種好似係炸蘿白餅..圓既le...唔知你知唔知我講邊樣...多人果是我就多數去中央球場... 哈哈,氣水蓋,我地重好中鍾意用圓果o的糖罐...跟住重插埋的手指落去...完場果時就一把火乜都丟曬落去燒... 幾壯觀呀...

中秋節o個個球場超多人响度煲蠟....唔知點解果時d人好鍾意搵條鐵線整個圈+夾個木衣夾當手柄,個圈上面擺個氣水蓋,倒d蠟响個氣水蓋上面煲,煲到成個野著晒火...再吐d口水/shushu上去....d火舌高過個人,o個時細個唔識危險,個個都係有樣學樣~ 好玩!

我是約1970年小六同學,重記得那時的同學名稱.陳x傑,徐x明,吳x照,李x恩,潘x華,駱x常,胡x清,黃x玲,曾x芳,祇記得這幾位.而老師有朱榮坤,黎老師( 那時年紀己很大了而聲音沙 )英文老師蕭潤基,校長黃河清.如有同學在這裡的話或可給我電:novemwind@yahoo.com.hk

魚...我個名好似中左2個字wor.. . 不過70年就一定唔係我...

miss a 朱榮坤.miss b是教音樂的

miss 叫龍影

真係好黑仔囖,打完機準備去上堂,出米鋪時比人佢見到,跟住上堂果時就篤我出黎....e+都唔記邊個...可惜果時5夠醒,5識自辯...5比我入去買午餐肉ga... 我都搬過幾次屋...應該重有o係度ge...真係要努力摷摷..雖然唔係隔左咁耐.. ...我真係唔記得有校歌囖....

勁呀! 我都記得有個叫龍先生呀

我好想可以再見到o個陣時景象,學校啦、操場啦、十五座周圍啦、細檔炸野啦、車仔面檔啦、.... 仲有....女同學仔啦! 可惜!

me too 呀~唔好話見啦,相都唔多一兩張~ 細個o個時又冇相機.....只剩低腦海一片模糊o既影像,所以有時講得detail左d多口水左d,諗住可能講講吓大家會有d印象呢 .....請見諒~ 龍影......嗯~一講就記番!!! 仲有樓上人兄話齋踢汽水蓋啦...用電話簿d紙渣埋一舊搵條尼龍繩扎住當波踢都試過~ 中央?...相信大家响果度都踢甩唔少腳毛.....之前影左幾張~enjoy

我都是其中一人.如果你是其中一人可否告知或電郵.謝謝.我也是其中一人

好懷念由36座行路上上面的觀音廟

18座係咪同17座chee住嗰座,如果係就我日日都經過你附近,因為小吧同3A都係嗰度落車,"17座有落",哈哈,記唔記得呀...我住21座...

我都在慈雲山20座住請問妳在幾多樓幾多號

我住18座樂輝樓5樓

我住509, 你呢

大頭仔你認識嗎?他家在 20 座地下開糧油的。你住幾多樓呀 ?

街坊喎!我都系 20座 (樂煥樓) 。

書友仔!咁耐唔見呀? 原來你住21座,我都日日經過你附近, 以前有冇上過配水庫公園,日落個景令到爆

我讀上午校, 我記得校長............Mr黃河清
我記得教我中文......Miss龍鳳翔 (回流香港)
我記得教我英文......Mr譚道均 (英年早逝)
我記得教我數學......Mr吳記得 (佢教我時已經好大年紀,睇怕....)
我記得我做過班長
我記得我做過風記隊長
重好記得四年級果本自然教育果本書中間果課孖頁的大圖,攪到我從此驚驚到死

譚道均做個我兩年班主任,英年早逝??講真定講假呀! 佢雖然有時幾惡,但佢絕對係一個好老師,希望唔係真架啦。

佢Cancer過身,好多年前ga事la.....

Too bad. 有無其他老師消息呀?

17座係路邊,18同19座就chee住啦.我就住18座五樓.呢度有無18座人呀.有就回覆啦

咁你一定去過正心茶樓飲茶啦,仲有一到下午19同20座樓下就有好多熟食檔,"豆漿加蛋"唔該...umm...好懷念...

我都有去過正心茶樓呀.那是潮洲人開的,個太子爺重肥肥地

講個秘密俾你知,其中一檔熟食檔係我屋企開...哈哈,不過唔好問邊檔,保持神秘...

我都在19座外邊度擺檔租公仔書的呀

点解我沒有印像,是大約甚麽年份讶?

年份我都唔記得啦.果時我都好細嗰大約係10歳咁上下啦,果時我記得好似斗零定一毛租三本公仔書

突然腦浮現17座至23座的景像,等我重整一下,给大家一個回味,18座(面對24座的那邊)有一間冰室叫祥記,很有怪,只是有通粉和意粉,沒有公仔麵,其實當時想問個老板點解,但一直冇問到,所以到現在對我來說都是一個迷,中間的段落我就記不清楚,到尾後就有一間打毛冷的鋪,反過來向17座那邊有一間賣學生服的和一間雜貨,另有一間是甚麽贸易公司,對開有一大排檔,有一橙吃車仔麵,一檔是做西茶,叫做超記,一檔是賣白粥油炸鬼,大排檔隔離有一長形的檔口,入邊有剪髮,只得一個位,最單邊有一賣生果,說到19座(面向17座那邊)有一士多叫強記,老板叫义哥,跟住有一間比較大些少的飛髮鋪,好似是2間鋪相連的,到向20座那邊就有正心茶楼,在一間药才舖,老板個仔叫药才雄,一間士多,我很細個的時間,每晚在19座楼梯就會有一炒小菜的大排檔,老板個花名叫鬥木佬,說到20座,第一間系燒臘店,第二間系酒舖,第三間好似系賣鞋的,第四間系雜貨舖,第五間系士多,叫做佩記,跟住就系茶楼,是正心,原本這邊的茶楼最初叫立記,但後來頂了给正心,到轉灣就是21座,這裡有一間診所,其它都是托兒所,叫德望,20座另一邊的店舖全部都關了門,沒有做生意,到22座,第一間是纸扎鋪,第二間是士多,叫林興,中間就記不清楚,但後來開了一間租單車给學生的舖,差不多尾有一間賣電器的,叫做連興,到最尾又有一間士多,不過我吾記得叫甚麼名,但我們叫個老板做馬仔,到23座,一邊是住屋,另一邊有一間小形的製衣廠,平時我們會在21座和22座之間的空地玩,雖然沒有設施,但甚麽球類都可以玩,足球,羽毛球.........,真服了我們是沒有要求都可以這樣開心,現在年青人就幸福好多,打羽毛球有冷氣場館,我的回憶不知要幾時才停下來,希望大家不要覺得我長編大論,覺得我煩就好了!

你能記得這麼多真了不起啦.我想信大家都不會价意.也沒有這個价意的必要.能幫把那童年時環境一一記下來是很難得的.返而我覺得有必要把它記下來.讓更多住在慈雲山的舊街坊回憶.就如你這些記憶.看了也使我想起童時的慈雲山多了一份親切,回想過去的兒時.有開心.也有不愉快.那時的社區.不學壞才怪.正心茶楼,药才舖,炒小菜的大排檔,鬥木佬,林興,纸扎鋪,馬仔,我都認識和常光顧,還有那間酒舖我老闆,間中我到現在還間到見到他出入.林興我印像最深.那時經常同佢買野.
你重記唔記得在18,19,17座中間的地方以前有好多檔口.(最早搬入時)那時我家在那裡都有間檔口.不過做不多久就沒有做啦.但有間賣水果的檔口唔知你有無印.那老闆是潮洲人.姓謝的.重有18座有間士多每晚做粵語長片都收一毛定是二毛就可以入去睇.我最記得就是如來神掌.白骨陰陽劍.

有人將兒時的藍田憑記憶畫成一本叫《錦繡藍田》的漫畫,我曾經有衝動想畫幾張《錦繡慈雲山》自娛,可惜畫功唔掂。如果有人畫功了得,又懷念慈雲山的話,呢度一定有好多人願意捐出自己寶貴回憶,去重建心中錦繡慈雲山。

是的真是希望有心人在這裡出現.我們一定願意捐出自己的回憶.

我也同意呀!

我都同意你的說法。還記得22座對上那個足球場嗎?從前我們叫做水塘球場,昨天早上我去了這球場,因今次場紙在這裡,我坐小巴上慈雲山,就在從前17座巴士站那個位置下次,一落車,陣陣的回憶又來了,入口有一條不算很長的楼梯上去,到了門口看見那條楼梯,我就馬上拿出手機拍下照片,想一下,不知留下多少腳毛在這裡,上到球場就多拍了幾張,但背景已面目全非了,只嘆一聲,時光飛逝,還記得當年在這球場由朝到晚的踢,有一樣沒變的就是,這球場依然沒有安裝電燈,所以晚上是不可踢球,本來我把照片放上來给大家分享一下,但容量過大,放不到上來。

在一九七零年後出世的慈友,可能不知道,八層的楼座,在之前家裡是沒有自來水的,所以走廊便有一個水龍頭給住客洗衫,不用後費的,一個在欄干的傍邊,一個在中間楼梯,外面有一石屎圍住,約一呎高,在沒有人用的時候,我們很喜歡把那個去水洞塞住,然後放滿水,好像個自制泳池,都可以玩餐飽,但後來房署要幫住戶在屋內安裝自來水,是要收費的,水表安在每家人的門,所以到工程完成後,這玩意就沒有了,雖然不可以再玩這自制泳池,少了一份樂趣,但對每户來說,的確方便了很多,而且避免了一些無謂的爭執,那個時候很多不偷快事就是為了取水用。

我記得水龍頭後面有間房,叫男尿廁

田雞兄,真好記性!後來這位置也改了用來住的單位了。

對呀.這個回憶可不少了.重記得小時要好用力才能按下那個手掣.一按下去那些水出得很猛,重記得制水的那一年.差不多時間就要用好多桶在走朗排隊,有時重攪到打交和吵架,都因制水引起.平時.重有時要上去觀音廟山上那車路邊担水用.那水出得好細.要用樹葉把水引出來再流入桶 內担返屋企.但須然咁.個啲水用來沖茶味道完全唔同水喉水,有一種清甜的感覺.不知那個水源現還有沒有存在,重記唔記得那時的垃圾桶呀.是一個近似四方形.而個蓋就斜斜地的放在每家的門口外.每晚到時到候就有人來倒垃圾,同時每逄過年過節.那個倒垃圾的就會到每家每戶拿年嚐( 錢 )之後就會在家門口打個記號,最得意還是那些厠所.是兩家人共用的.大家都有厠所匙.遇著人有三急時就祇有在家用(談冠),到家中那個去水的地方,也是兩家共用一個去水位,到後來有了新起的16層的樓才有自己的洗手間.

嘩!你記性真好,但還有一樣是放在每層楼的走廊,但後期沒有放了,就是一個花生油罐,叫做x水筒(我不董寫這個字),是给每户吃餘的飯餸掉進去,是一些養猪的人放的,每天都來收走。

通常擺嚮中間樓梯口,好似叫餿水桶!專系愛來收集d送頭送尾造豬餿餵豬!

原來是這樣寫,謝謝你!

18 座我就不知道看電視的舖,但我剛剛搬去慈雲山的時候,是1966年,當時在我楼下有一間織籐氣的舖(面向22座那邊第一間),他們都有電親看,到播影的時候門口就拉一塊黑色的布,好以是一毛子收費。到冇幾奈,記得嗎?學校的遊樂場安裝了一部電視機,放在很高的架上,每日下午就有一個管理員來開電視,不個大高了,每次看完頭都梗埋。

講到如來神掌,你又令我勾起一陣回憶,這粵語殘片在電視播個好多次,印像特別深刻,早幾年曹達華死了,聽說電視都有重播,可能是在深夜播,所以沒有再看,劇中的人物真是到現在我還是刻骨銘心,龍劍飛當然是主角人物啦!其它的還有火雲邪神古漢雲,白衣冰心,煙霞山莊的求玉環,求玉娟,無定飛環孫碧玲,九索飛玲柳漂漂,長離七斬北孤和他的徒弟陸如,天地人三魔和天蠶腳,當時我最喜歡的是金眼兒,成日發夢都想有一隻,可以飛來飛去,想起當時的天真無牙,現在內心都有点笑,但感覺很好!

如來神掌我而都有一套重久不久播下,最近重有埋魔宮神掌.

講起白骨陰陽劍,住在你們那邊有一位叫白劍,你認悉嗎。那個生果檔我記得,姓謝的老板有個女兒經常幫他看檔,我認悉她,每次經過都有跟她打招呼!

你都好好嘢呀,都知道附好多嘢呀.唔怪得你叫慈雲山之友果然名不虛傳呀.的確他姓,個大仔叫謝x龍.現在一個人獨居.

過獎啦!就是從前太頑皮,整天在街流連,所以樣樣知少少囉!

我知啦,你一定就是賣炸嘢嗰一間啦,如果唔係.你不如開估啦.好心急呀

無錯,我就係賣炸嘢嗰檔,嗰陣時五毫子兩件,而家五蚊四件,too貴...

這張使我想起那時住在13座的同學 駱X常 和他的哥哥 駱X高不知他們現在如何!

原來呢渡咁多太子爺,真令我羨慕

我小時在一間紙袋廠工作常常送貨到這座大廈的三樓.那戶人家好像名叫麥老定,

各位有無18座的照片.要向住24座那個方向的.

novemwind 兄,相就冇啦!不過向住18座個景就係我個腦渡, 我估我地屋企係對住,有冇試過比人用鏡反射陽光入屋, 中秋節有冇同24座鬥擺蠟燭陣呀?

我以前是住47座1203的,對正"中央球場",一個字"正", 空氣好,景觀高,好過而家D豪宅

何止是豪宅.直情是有錢都買唔到

我都住18座7樓,我讀五邑鄧樹春下午校,我是1976-77年畢業的,好懷念在慈雲山的兒時舊事,仲記唔記得18座地下一間冰室,甲餐食湯意粉 $3.6,乙餐食通粉$2.4,但唔記得個名,你記唔記到?

咪系!如果唔系政府要重建的話,我真的想往返47座望向中央球場位置,起碼空氣好D人健康D, 我兩個老人家一搬落礸石山後身體每況愈下……,以前每天早上4時起身行觀音山..上到獅子亭左行返落黎,有時仲行左去沙田飲茶,身體好過我地D後生多多聲

鑽石山啲地好硬.唔合老人家,你可以試下種下花草等.會旺吓地下.對老人會好啲

咁我記得啦.唔怪得我家常常有光影射到我的家中.原來係你,我記得你住在三樓的是嗎

咁我約都有些印像啦.但佢檔係潮洲人唔知你係唔係.重記唔記得19座樓下厠所傍邊有間士多店同埋有間茶樓唔知你記唔記得果間茶樓個名呢,如我無記錯好似叫正心茶樓.但士多記唔到啦

重有呀,有一間賣酒的和一間賣米的就在19座對面.( 唔記得是20座還是幾座掛)有時我都見到那個賣酒的老品

果然係舊街坊呀,我都係潮州人,無錯,嗰間係叫正心茶樓,士多就唔記得咩名lu...

為了尋找1976-77年慈雲山五邑畢業鄧樹椿下午校同學,現上傳4張畢業相,若有同學在內,請與我聯絡,我是張X達,E-mail : unclemaux@yahoo.com.hk









好多師兄弟 我都係校友,約79年畢業......下圖右4是教中文,正中那個教自然,左4是劉Sir教英文,最左一是叫白粉梁

的確.真是希望多些五粒豆士春的同學能到這裡.也希望更多同學在這裡聯絡和發表,

看到這張.真是使我感慨,真好想一下子走回那個年代去,和他們見見面現在還可以見到這些照片.須然我不是這屆畢業生(希望我可以找到70年的畢業相.)到時擺埋出來比大家睇下,但中間男生那行的右手邊最後一個同學就好似有些少面善.但記不起是那個名字

唔怪得之我搵極都搵唔到啦,仲以為冇人update。原來搬左來依度(尋覓舊友區)。咁都冇禁驚。

好彩你提番起,我最記就係佢啲鮮牛肉通粉,真係正到絶世而家在外邊食極都食唔到咁正.出邊個啲好似老到佈咁.唔似個間有牛肉的鮮味.入口熔化,真係好到難以形容,到而家想起都流口水.我重記得隔離重有間士多.重有一間飛髪店.重有一間個老細叫呀 ( 邱 ) 細個時比2毫就有得睇粵語長片,個老細而好老啦,去年我都見過佢一次,重好健談.

最近重想起個時有個體育老師叫 容滿添 唔知有無同學記得

呢度要長期保住至得唔係就散啦

希望有人記得起啦.各位請幫下手記下啦

我住18座5樓,我姓陳x傑

我是76年下午6B班畢業, 相入面應該有我, 但我自己都認不出自己了. 記得(男生相)前排左一應是教體育的 范生, 左二是我的班主任 馮文轁 先生, 左五,六是正副校長, 右一應是教中文的, 她令我考到升中試好成績, 要多謝她, 但忘記了她姓甚麼, 慚愧得很.
我當時住16座, 年年的年卅晚都走遍15,6座"賣財神"可能見過你,妳,你妳...........

係呀.可能我都見過你都未定,好彩又多個同學仔回憶啦,須然我同你唔同期.但都好高興再有同學在這裡.

全部都係十幾座 有冇44座丫

你是年76-77下午校畢業的,我們應該相識的,你在相中找不到自己,可能是相片未能全部展示,我已經重新整理個相片,你再找多一次吧,另外你所講教體育的馮生,我都有印象,但校長應該是女生相R3右邊第一個,第9個miss是教數學的,第10個是教英文的miss wong,另外女生相R4最左邊第一個教中文的miss張,我最有印象,因她好好人的。

我應該是 75-76 畢業, 比你還要早一年. 老師們的姓名真的很難記得清楚, 多謝指正. 但我記得好清楚班長是個女仔叫"黃金愛", 及一個女同學叫"周玉娥", 因為有一次0係操場玩0既時候撞親佢隻眼, 搞到佢要入醫院聯針, 破晒相, 現在仍然好內疚.

我地是街坊了,可能相識的,你記唔記得6樓有個女仔好靚女的,經常一大班男仔圍住他的,你識唔識李坤年?

你讀6B班,你記唔記得有幾個男女同學的名字,鐘金微,張月朠,李坤年,陳碧昌,陸雪美,馬劍華?

我有個同學叫做陳碧華,不知跟陳碧昌有沒有關系,他住 32 座的。

李坤年我就無印像.但嗰個靚女係唔係潮洲人呀.佢家中是不是外發工比街坊做的呀.佢家是六樓506室嗎?



仲記唔記得有個阿嬸經過在18座各層抬住擔挑賣豬油渣粉仔,超好味,懷念嗎?

記唔到了,只記得個時每一層樓的小朋友都在同層天井玩,我就成日落6樓玩,仲記得的女仔年年都玩香港小姐選舉,男的就玩波子,貼子,紅綠燈,一到中秋節,18座每樓的小朋友都會同24座鬥點得臘燭多。我仲記得個靚女曾經同5樓中間樓梯住的一個男仔 (潮州人,佢爸爸是一個好有影嚮力的潮州叔父) 拍過拖。

慈雲山48座的大排檔最正! 呢個生記都仲有做,不過去左萬年度做,但仲勁多人食,都係擺到出街。 中央就真係冇乜點變,除左個沙池冇左,都係差不多。 聖文德隔黎間士多叫"文記",成日小息都隔住鐵線網買"媽咪麵"淨面食。 但查實係對住個垃圾房,但要係偷偷地食。
我由細到呢家都住慈雲山,真係睇住佢變,不過我住49座,所以十幾座的唔係好熟。 最記得細個通街走最怕見到童黨,因為d友仔真係傻傻地,記得城城套"童黨"都係慈雲山拍。 o個時最憎d友仔玩"fing秋",成日要爬上去解返個"秋"落黎。

都係你好嘢.中間樓梯對住重有一家人成日好多人在她家裡打麻雀,佢兩個仔個大仔我地叫佢個名做大傻,個細仔叫粒的,唔知你有無印像啦,而個有力人士無錯是潮洲人.他好們幾年前過身,一時間都記唔起佢個名字.你有無印像重有一個人家住5樓.他有三個仔.三個都是男仔的.好像是姓周的.還有一間她有二個女.好像是叫大眼的.和住樓梯口弟一間的潮洲人養狗的.有印像嗎

粒的我細個嗰陣認識佢,重跟佢打個交,但後來沒事,見面都有打招呼,想起來,在這環境下長大,真系吾學壤都偷笑,每座楼都有些出位的人物!例如~~~18,19座有 "七楼雄""八楼文""傻仔明""红鼻"27,28 座有 "new 屎文""大孖細孖"20座有"魔鬼永"22,23座有"雞公德"這個雞公德在八幾年嗰陣在 13 座给人打死了,有個叫做阿盈,幾兄弟都是同道中人,還有個叫高飛,相信你知是誰啦,他以前是電表房的常客,以前每層楼都有個電表房,外邊是油了橙色的,其實有鎖都冇用,用力一拉就開,那些同哥同姐就當正自已屋企一樣,系入面睡,回想童年在慈雲山生活的日子,真系講三日三夜都講吾完,慢慢一起回憶啦!忘記告訴你,我是姓鄧的。有冇印像!

你都記得好多.有幾個都有印像,傻仔明""红鼻,高飛.我就記得.那裡就是他們的家啦,對他們特別有印像,真是對不起.祇有些少印像,但記唔起你到底是那一位,但腦內的確好像有一位姓鄧.三日三夜不算得怎麼,人生在世也祇是很短的時光,能回憶過的時光,也是一種快樂

對呀!我跟你在這些環境長大真是有一種很特別的回憶,我相信我們的下一代將來需有回憶,但一定比我們平淡很多,我有時跟我兒子說起慈雲山的事,自己感覺很興奮,但他就覺得很無聊。

你說得對.有時自己睡覺都會想起兒時的母校和慈雲山的日子,想起過去.日子過得真快轉眼又過了三拾余年.而家一把年紀.也祇能懷念過去的日子,現在的孩子和我們以的生活和娛樂.真是天壤之別,

係呀.我都有吃過真是超好味呀.個啲好似叫做狗仔粉

唔知而家重有無果時的人在那裡賣的好食0既 嘢啦,有的話我都想回味吓

睇黎都要有一懷舊之美食團啦

原來是舊街坊,我是74年上午校畢業,我住20座,後來改了做樂奐楼,你提及的人我都知道,18座真系好多潮州人住,我可能都認識你。

可以告訴我你貴姓嗎?真係好想有識得的人在這裡遇到

我有畢業相在手,但是照相那天我病了,所以沒有我在相中,其實真系好可悉!那時候我們通常都是在20座五那個騎楼玩,其實我都經常見到你們五楼有很多人在玩,有男有女!所以你說是住在五楼,可能我地大家都有見過!在騎楼第一間是姓周的,你識嗎?

你的記性真好呀.可能我年紀大啦.記唔到.好得你重記得.我須然住在五樓但我就好似好多嘢都記唔到.真的我們可能大家都見過.那家姓周的有些少印像.重記得有一次下大雨,那些雨好大.我還站在欄杆處任由雨水打.成個人站在那裡.傻下傻下咁.記下記又記回多少童年的回憶.

我都好希望你識得我,那時我住18座5樓.我都係潮洲人.我姓陳的.唔知你有無印像

你有無一些片或畢業想睇下.我而家正在找.唔知找唔找到.如找到的話到時貼出比大家睇下有無識得.不過我記得我那一年有幾個同學的名字.比你記下睇下你識唔識
有 胡x清,黃x玲,羅x鄉,李x恩,駱x常,吳x照,潘x華,徐x明.希望你識得呢個人啦

個名叫祥記,我經常在這裹吃早餐。

你唔講我都唔記得個間叫祥記.一提起我又想起他們那個鮮牛肉通粉

洋服店老板好似是客家人,我吾知有冇記錯。

唔係呀....我老豆冇乜鄉音架~ 係廣東人, 哈,你話如果有個地圖.....有晒大家記得慈雲山o既鋪頭名,有咩特徵...咩好食/好玩
一見到,大家實好有共鳴!!!

唔知有無58座3樓的人在這裡呢.

你記吳記得20座地下有間雜貨鋪呀!間鋪嗰大仔叫大頭仔,識得佢嗎?他是我的朋友,因他是住在20座五楼。

記得15座有間鄧一龍武館,同一間叫枝記士多..... 當年番學前就成日上15座天台遊樂踢波,同係枝記玩足球機~~ 噢~~~~成三十年

枝記同鄧一龍我記得呀!!!!! 咁記唔記得十五座地下o既舖頭名?(除左你講過果d之外), 因為我通常都跟老豆叫隔離舖d花名,本身個名就唔記得喇! 面向五邑o既舖頭由頭至尾以我記得:

勵害,記得這邊好像沒什甚生意,另一邊生意好很多......還有記得14座地下是間幼兒園轉了去13座有間叫天龍的茶樓旁邊有間書局叫文?.........

我畫左幅平面圖,有什麼辦法可以貼上黎?

唔知準唔準,有興趣請supplement



利害,記得枝記同士多中間有幾間雜貨店

我記得楼梯中間個空地有一塊排典寫了港督開幕的字,好似系戴倫子。

1.細細間士多,平時阿嬸睇舖...有兩個孫一個叫肥仔傑,一個叫阿豪,佢地媽媽矮矮肥肥,假日先返黎一次,去果度買得最多應該係冰條
2.一間大糧油米雜貨舖,有隻老狗叫阿才
3.連接五邑&十五座樓底...阿才成日灘响果度,好似咬過一次人,行入d左手有男女公廁,右手係舖頭後行
4.吉舖
5.潮洲山貨舖,有個婆婆叫阿E,有時有節掛d大紅潮洲燈籠好靚...有個孫仔肥肥地
4.我家洋服舖
5.衣紙舖擺貨用(關門的)
6.藥材舖飾櫃
7.藥材舖,老板叫阿全...姓楊的,佢老豆是一個白頭老伯伯,成日借電視我睇,有個女...舖頭叫咩名really唔記得
8.士多,老板娘好好人叫貞姐,應該好多人認得佢,佢就係小息時成日幫你地將買左o既野食遞過鐵絲網,有個媽媽、哥哥楂貨櫃車,細佬叫"Low時"
9.唔記得
10.衣紙舖+文具舖(唔知有冇記錯),細個d文具就係响果度買,老板係個伯伯....個孫好似叫黃x輝
11.洗碗位,有個後面舖茶餐廳o既阿姐响度洗碗
12.長樓梯上十六座,上到一半有個空地...

好得又多一個人記得有這一間武館.我記得他是教螳螂拳,重記好像有一間叫黃國贊也是武館的

黃國贊我也有點印象,好象在一間專賣校服叫源興祥的乎近~~

源興祥有個女開保母車既, 我都有坐過幾年.

對呀!源興祥也是在16座,又是面向17座,比較接近聖文德小學,這間源興祥現在也在鳳凰村,近聖文德中學呀!

三十多年的老店......難得

對呀!在16座地下,是面向17座那邊。

点解對這武館特別深刻呀!你跟武館有關系??

印象深刻是,明明係一間武館後來無端端賣起餐旦面,咖啡, 奶茶等等, 餐旦面係用福面,上桌時有碗和蓋,鄧一龍會告訴你......焗一陣先食~~~

嘩!都好久了!鄧一龍的兒子是我同學呀!這間武館是教螳螂拳的,所以我知他是客家人,支記我都有印像。

其實鄧一龍的功夫及名氣都不算好,有鬼學生咩,後來就轉左做飲食囉!要養妻活兒嘛!學生証你都可留到現在,我就沒有了,只留下升中試時的成績表和沒有我的畢業相大合照,你當時住在第幾座呀?

當時住33座,等我慢慢重組當年放學路線..........

你住得很高,放學就慘些,一條大斜路直上,冇理由走去13座對面坐 3A,15A,3B巴士。

前排左二是教英文的Miss王,當年她身體很差,上堂時成日搽白花油,後來移民美國, 左五是教中文,好像姓陳



剛剛翻開一合舊東西看看,原來學生証還在,我個是黃色的,1973~1974,比你早二界。

唔知有冇慈雲山34座七樓o既街坊嚮道?

我有親戚好似讀過...

記得水塘公園個日落景好靚,以前22座有單車租, 多數都會抬餐死上去玩,如果淨係三五知己上去, 我地一定爬山,唔會行樓梯,我地叫果渡做傻佬山, 重有掘番薯,即時執柴枝呢煨,可惜......只能回味!

系呀!有一間租單車,我跟這老板認悉,他的兒子也是我朋友,我記得去踢波時,如果個波冇氣,我就叫他幫我泵氣,不收我錢的

我都記得22座對上那個足球場,樓梯入口乎近有間火水站,樓梯兩旁有好多古古怪怪神主牌之類~~

山上系有個傻佬系度住架,每次見佢都很多狗跟住佢尾,聽說他是大學生,本來都系住我家附近,後來因為讀書壓力大,攪到儍左!但過了幾年,吾知点解見不到佢!

想起這火水站我就有惨通的回憶,記得當時我家還是燒火水爐,爸爸說火水站價錢比家裡楼下的雜貨舖便宜些,剛好我又話細吾細,話大吾大,爸爸估我可應付得來,連送貨費都省埋,從此之後,買火水就落在我身上,其實我分好多段才抽到回家,最惨就是抽上楼,攪到上氣吾接不氣,現在想深一層,爸爸都是對的,作為家中一份子,出点力嚒!

當年的小朋友是比較吃得苦~~~~~~

想起........這種古古怪怪的神主牌,是不是曾灶財先生的墨寶????

神主牌的問題到現在我都是一個問號,不知道誰放的,從沒有看見放的人,你有沒有發覺呀!這現像到今時今日還有,有時看見山邊仍然有人放哦!

從前我們的慈雲山友通常看戲都是在附近的戲院,如慈雲山的萬年,新蒲崗的亞洲,國寶,英華和麗宮,相信大家都有印像,前天我囝囝看戲回來,在袋拿出戲票,就使我想起從前的戲院,大家記得嗎,從前的戲院比現在的大,還分前座,中座,後座,還有楼上的超等,好像麗宮還有頭等呢,從前戲票是用鈉筆寫坐位的,那些售票員要把坐位行數及坐位號寫上票上,通常寫的字都很亂,好似中醫寫藥方一樣,所以買票的時候,都一定要記住第幾行,雖然有帶位員,但可省時間嚒!大家想不想懷念一下從前的戲票呢,我還有些珍臧,現抽一部份给大家回憶一吓!

















講起麗宮,F1那年第一次睇咸片就係麗宮睇,名片仲記得叫十二性座........

勵害勵害

睇到呢啲票.真係有些沖動.好想而沖入去睇下間戲院.同時又好感慨,睇下其一張.都而是20多年前的戲票,但還是好像是不又久之前的事.也好像是昨天的票.一過己是多年.真是多謝慈雲山之友.使我又可以看到年青時的過.

我們童年時雖然住的環境不太好,物質也沒有現在那麽多,但我相信,大家的童年,開心的比不開心多,至少大家真系冇壓力,很健康,不像現在的小孩,被蚊釘都話要去看醫生。

以前拋個身出黎”冷巷”,幾條o靚仔,什麼都可以玩一餐,好易滿足。而家住靚、著靚、玩靚、食靚,搭車無冷氣都唔得。我真係見過有條豆o靚架無冷氣巴士度發老豆老母脾四。以前老豆老母要搵食好辛苦,我地就算貪玩都有個譜,識生性。而家D o靚仔好似大帝咁。我最怕見到D老豆老母”哎”D仔女食飯。

現在啲細路仔就幸福得多啦,從前淨系冲涼就夠惨啦,夏天都好,還可以冲凍水,到左冬天我地就要用個啲燈芯棉的火水爐,煲水就要花成粒鐘,跟住較水,然後又要抽去廁所度,徐得衫來啲水都凍晒,重要拿拿林冲,現在就不同囉,鈕開水喉就有熱水,咁嘅環境,現在啲細路邊有試過啦!

又打完風啦!從前打風後就會有一現像在我們的舊區見到,就是天台會有些人在修理電視天線,全部要把天線向回發射站,現在不會見到這現像了。

從前學校對面12座有間藥房叫和春園,11座有間茶楼叫金鳳。

hihi,咁啱見到呢post,我係五邑鄧樹椿小學83-89讀上午班架,細個住响第三座,返學過條班馬線就到,好方便,唔知仲有無呢界畢業嘅同學係度呢?

提起麗宮,門口有檔推車仔好經典,買菜干豬肺湯~~~

可鍾意個檔生菜魚肉多啲,個老細成日企上張発到睇水。

以前只系見到男女主角嘅背脊就已經可以令人流鼻血,散埸走出來個個都急急腳,這時候很保守。

記得細個放學好鍾意落去南區社區中心玩架~打兵兵波呀,康樂棋呀

嗯.......好似要申請個証先可以玩~

我都係,不過多數到小童群益會借書.你記得它在哪裏嗎

我係讀至正學校的,1976年畢業,想跟同學仔敘舊

細個時好鍾意打乒乓波、同人猜台....唔記得17定18定58座有個高高瘦瘦後生仔打波好勁,人稱"球皇",有冇人有印象?

我搵到幾張相







我認得你個班主任,不過唔記得佢貴姓。

好似係姓譚,仲好惡tim架

我住12座,1987年五邑鄧樹椿小學上午校畢業



請問你叫咩名呀?請pm我呀!thx~

唔知有無記錯。



你張相好正.....睇到好大半間學校, 我果d得一個角落頭咁大把~

我係 90-91 係五邑畢業的, 小一至小三係約榮讀之後因為要拆所以小四至小六去左五邑, 我小六係五邑畢業咁巧合佢又要拆, 好似我讀到邊拆到邊咁, 睇番樓上 87 年張相有好多老師我都識,最記得既係"粱粉佬" , 佢呢個花名真係好搞笑, 就係因為咁搞笑所以到而家都仲記得, 小朋友既時間實在太愉快啦 ......唔知有無同我一年畢業既朋友係到呢?

你地搬走時康樂中學進駐左五邑鄧樹椿一兩年我讀過, 好記得有一年小息完岩岩返上課室時就係哩道睇住出面~落雹!

睇番o個時d學生幾咁天真無邪同撲素, 相比起,而家o個d應該係勁難教.......

我都認得你個班主任, 好記得佢把老牛男人聲!!! 係呀.......佢好惡架!~ 細個見到佢都唔敢望佢~

我想知道,我細個試過响一個地方度剪髮....由16座上去o既,果度唔知係幾多座呢? 果度日光日白黑媽媽,得幾間鋪開,响d巷仔度,有幾條巷,感覺有d似街市冇開門做生意咁, 剪髮價錢當然係好平,又有好多殘舊老夫子睇~ 行返出黎好似係個停車場之類.

hihi,我又黎報到先,我係90年畢業嫁,我叫王志偉,小一至小4係讀下午校既,因為就拆既關係,所以小5開始就冇辦下午班,所以下午斑d人全部都轉哂上上午斑,唔知呢度有冇我同班既同學仔呢??? 我記得同我熟既女同學有 張x華. 譚x雲, x泳詩, 吳x玲, 男同學有 吳家x, 文敬x, 朱x明, 鄧x棠,等等, 而下午班1~4咁多年都係miss楊(需)英做斑主任,上午5~6就係miss朱榮坤, 我既e-mail係:ray8634@hotmail.com

我花名係五粒豆鼓椿, 三座我都是居住22.座9座.我是住27座,我是讀過慈雲山五邑鄧樹椿小學。同學會 我5兄弟姊都是讀這間學校長大。真的好希望和你交流一下。如果各位也是五邑同學仔不訪add我啦..... 我的e.mail.barryseeto@hotmail.com....給這相片你看下我們會否相識呢?



真高興見到愈來愈多校友呢度。又可以睇返唔同年代相,好『僅東』呵!

各位慈雲山的舊街坊好呀!我以前住15座2樓的, 屋企係16座開士多──興發士多, 小學讀五邑鄧樹椿, 87年畢業, 上黎相認一下~~:p

我都是87年畢業上午6A同學有 林X康,張敬X,雷志X,蕭玉X,馬X義,白志X,謝日X,~班主任MISS李

16座開士多,I used to buy food there.

仲有間叫~波記~我都係住 16座~83年畢業五邑鄧樹春!上午校

6B班果度有個隻手有問題的同學仔我都記得佢~ 但我讀 6A班的.....有無舊同學有相呀~ 而畢業相太蒙看不清

唔知去晒邊,我都好想搵返。你張畢業相蒙d都殺啦。scan 來睇睇。拜託。

你誤會 la~~~我一張相都無....只係話樓上的相蒙查查睇唔到.....

後排男生由右至左第四個我記得曾同過一班!



冇奶油喎,呢張相裏面我一個都唔認得,你係响83年畢業?6A班班主任係譚道鈞喎!

係呀 6A班....班主任譚道鈞~帶眼鏡架馬~ 我記得班中有個弱智咁 ge 女同學添..... 我排隊排最後的......

你排隊排最後,咪應該係陳志亮囉!

我唔係佢~ 佢屋企開雜貨鋪架馬.... 佢家下好似搬咗去鳳德邨.... 有時撞到佢佢都唔認得我~

各位五邑之友, 我當年係住15座四樓架.....1979年係五邑讀小一下午校, 讀完四年1983班就轉左校lu。唔知可唔可以揾返d同班同學呢?

我都係住 15 座 4 樓既.

之前duelequartz話佢屋企人係15座地下開洋服舖,我記得我有個同班的女同學叫""邱X貞"正是住在正正我樓下的洋服鋪, 唔知duelequartz你係咪佢屋企人呢?

15座樓下應該只係得一間洋服舖,但唔係姓邱架喎~你係咪記錯左???

但我的同學仔真係住正係我樓下間洋服鋪架wor....我仲試過係我屋企4樓拋水蛋落去地下.....咁想請問你係邊年讀呢間小學架?上午/下午校? 可能我記錯同學仔個名........好想find out 一吓!

我直覺你係講o岩個名,姓就錯,我的確有個家姐84年畢業的! 不如你講全名啦~

我叫"謝韻芝".....我講個同學好似叫"淑貞", 你係咪男的?

你邊係姓謝呀!吳係姓鍾咩?

點解我要姓鍾呢?????你記錯了???你睇我用戶名????iristse...........你做乜叫 吳講得???? 你係咪'"我所揾緊既同學仔"呂x貞?呢??

係囉,你冇記錯......你同學的而且確係我家姐~ 邱淑貞係花名黎架下嗎? 我係男呀! 掉水蛋果時仲咩唔搵埋我???勁鍾意玩!

我記得了.............你地姓'呂"的, 對嗎?

你細個同佢好熟架???

我係呢間小學只係讀左小一至小四, 認該係幾年都同班tim........仲坐過我隔離位.....再加上你地係正我樓下住, 所以印象比較深刻d... 不過佢都無乜反應~可能佢已經唔記得我lu...

咁我應該無記錯你係細佬.........我同學(唔記得全名)係家姐啦, 我啱唔啱呀?

我都係87年畢業的, 不過我係下午班, 這張相我識得的上午班只有最後排最右手邊那個男仔姓郭的, 是不是呀? 因為這張相我都有係度, 唔知仲有無當年(87年畢業的)下午班同學仔呢?

相信好多唔好成績o既同學仔都响呢張野上花過唔少心思.....梗係冒簽啦,唔通繡花咩? 我當然有試過,不過呢張野成績都尚算ok,唔駛出手住!!! (冒簽呢家野經過專人多年嚴格筆蹟及力度訓練,細路仔千祈唔好學!←因為點都會俾人發現), 同埋我將教過我o既班主任chop, fusion左响 "家長簽章" 度......等大家認下佢地d名,懷緬一下~





大家好,新加入,估唔到有哩個forum,真興奮, 我好似77年畢業,應該係大師兄la我住6座

果然真係大師兄啊........hihi! 77年我仲讀緊慈雲山禮賢會幼稚園呢!

我重遠哟,1974 年上午校畢業,之前在慈雲山住了 26 年啦,很懷念在山的日子。

新人加入,終於比我搵到有關『五粒豆豉春』的...... 我66年出世,住十五座十一樓,讀下午校好似6C班畢業。不過唔係好記得78還是79年畢業,當年係陳孔桓〈花名陳恐龍〉做班主任。爬文時見到『unclemau』貼上來的畢業相,見返好多個當年的老師,不勝感慨...... 我記得大約十幾廿年前,曾經同小部份同學聚過舊,但最後都因為重建而完全失去聯絡。我爬過所有帖,找不到半點同屆同學的線索。其實我都記得好多同學的名字,遲D貼上黎尋下人先。 『duelequartz』長大的洋服鋪需然和我無乜關連,但我記得有時夜晚去十五座樓下個男公,會撞正你亞爸響度沖涼。

我對自己的畢業相一D印象都無,可能無買到都唔出奇,但我應該有四、五和六年級的旅行班相,四年級應該係烏溪沙;五年級就好似係浸會園;六年級唔記得。同埋本紀念冊,如果搵到應該可以知道自己響邊一年畢業。我唔係考升中試而係第二或者第三批學能測驗加電腦派位,我估計自己係79-80畢業的。

由於年份接近我的小學生涯,借用了『unclemau』兄的76-77畢業相,回憶返我對一群老師的點滴,當時我應該係三或四年級。
《A》--楊Sir,全名好似係楊國樑老師,只記得佢教過我「體育」同課外活動『雕刻』。90年代頭有一年中秋前去旺角教協買月餅時見過佢響度幫手賣。
《B》--馮Sir,全名好似係馮文韜老師,未正式教過我但係有上過他教的課外活動『急救』。好多學生應該都會記得佢因為係佢負責影旅行相。
《C》--他完全無教過我所以連姓氏都毫無印象,但個樣就好記得因為當年黎計佢算係好型的亞Sir。
《D》--這位亞Sir無乜印象。
《E》--這位亞Sir亦無教過我但印象中應該係姓馮。雖然我無參過課外活動『書法』但我卻記得係由佢負責的。
《F》--陳Sir,全名係陳孔桓老師;花名陳恐龍。我畢業果年佢係我班主任教中文的,五年級好似都係佢。
《G》--范Sir,全名唔記得;花名飯鏟頭。佢教過我「社會」和「體育」。記得上他的體育堂最無癮莫過如佢教土風舞。但凡記得佢應該都會記得平時會響萬年個邊間體育用品鋪度見到佢。
《H&I》--兩位Miss我一點印象都無。其中一位是不是下午校的校長--司徒珍,煩請大家指正。



《J&K》--這兩位Miss我無乜印象。
《L》--這位Miss雖然無教過我,但我記得佢因為佢係同我同姓的。

《M&N》--兩位Miss都無乜印象。



《O》--無印象。
《P》--無印象。
《Q》--無印象。
《R》--好似響低年班時教過我,好似係姓黃的。
《S》--記得她的樣貌,但她從來未教過我,所以唔知姓名。
《T》--如果無記錯,佢影張相果年應該做緊我的班主任,印象中佢係Miss Chan,教邊一科都已經唔記得。但印象最深刻是她的父親是在做緊我班主任的期間去世的,重記得係上緊堂時有校工黎搵她,一輪耳語後她就走了,之後幾日的堂都由其他老師代課,跟著一段長時間都一臉憂傷,仲試過教教下書喊添。我好記得有一次小息有個女同學叫我去睇果本「教學日誌」,原來入面其中一頁寫左句「人皆有父我獨無」,好肯定係Miss Chan一時感觸寫落去的。
《U》--她是Miss Wong,她是我小學生涯中牙齒印最深的一位老師,她是教英文的,當年勁默同狂抄「不規序動詞表」,而我就因懶惰所以默親都唔識;同成日欠交D罰抄,結果當然係時常比佢勁、罰企、留堂,而見家長係最大鑊的,見完一定比亞媽打鑊金。
《V》--無印象。
《W》--好似響低年班時教過我,不過唔記得姓乜。
《X》--無印象。
《Y》--無印象。



W 是不是 Miss 鍾? (鍾可兒)



Miss (I) , 係黄翠雲老師, 我小一至四的班主任!

Q~陳金煥(低年班班主任)。V~教音樂(贊我唱歌好聽・Y~校長司徒珍(打過我一次・把木間尺好厚・而家重記得・



佢話唔係好記得,只係記得某d靚仔同學咁話....我有佢張畢業相,有機會貼上黎俾你睇吓~不過可惜冇你的~ 我都係同你一樣....讀到小一至小四,如果唔係拆.....我一定讀晒呢粒豆豉,你呢?讀得好地地做咩轉校???

因為當時同我住的外婆死了......要搬屋所以也要轉校!



哈,你真係好記性.....果個廁所對於當時d街坊黎講一d都唔佰生~ 當時年紀仲細,夜媽媽一條友要開大都咪話唔驚.......三格一條坑o既廁所,真經典~mau得辛苦之餘,後面格會見到前面格痾d咩屎!

話時話我應該都大過您好多下,因為15座拆卸重建時我已經投身社會工作;而您仲讀緊小學。所以我對您左右隔離的鋪頭的回憶可能同您有D多唔同。
我記得係連續有兩間『衣』紙鋪,較近您洋服鋪的一間我有時會幫襯買文具。每逢中秋個燈籠陣印象深刻。 最尾有間鋪頭成日都蒸麵餅,傳出陣陣香味。您洋服鋪隔離間士多係兩個鋪打通的。「枝記」可以講係15座的經典,我記得我最後在15座「浦」的日子佢主力係經營緊一檔街邊西茶大牌檔的,鋪頭則租埋隔離果間發展成兩個單鋪,原則上用黎擺貨同打痳將的,當然仲有果幾部放響一幅由一箱一箱檸檬和福麵所築成的牆後面的電子遊戲機。記得當時興緊「蜜蜂機」、「小偷機」、「猩猩機」......。「枝記」其實做過好多行,記得的計有租單車、買觀賞魚,亦引進過一D當時頗新奇玩意如入錢汽水機、爆穀等。好記得「支記」第一部放響門口做生意的電子遊戲機係乒乓球機。「鄧一龍」都係變身做西茶大牌檔,但和「支記」不同的是「鄧一龍」係響自己鋪頭同鋪頭門口經營的。我最有印象的是有次幫襯,正奇怪兩樽唔透明又一模一樣的點分鹽同胡椒粉,發現原來樽頂的小孔一樽係排成『S』;另一樽則係排成『P』,當時心想D師奶點會明。我中一、二時間中夜晚都有響您鋪頭對出;小學用黎做操場果兩個籃球場踢足球。果陣晚晚都有班人踢波踢到熄燈,唔知您有無印象。中三後就好少浦15座,轉去浦中學附近的橫頭磡。

睇番d相,記得呢個阿sir, 當時有一排好似話個肝有事,後來佢屋企人捐左一半俾佢好番,自此見到佢行路都慢左~唔知有冇人有印象??? 佢又係叫咩名同教咩o既呢?



哈哈你係咪同我同班? 我係鄭安國,你係馮仕良?黃錦全?陳少良? 仲記唔記得我們同班女同學個名黃玉嬋,易美儀, 我想同你們聚一聚,請PM我

好耐無上來,又有新(舊)同學。但係... 你題過的馮仕良、黃錦全、陳少良、黃玉嬋、易美儀名字我都有印象,但你的名字就記不起了。但你又同TWT咁Friend,可能我地未同過班。我讀過1-3B and 4-6A。你呢?

CSH....我同鄭安國早日前已茶聚....多謝杯奶茶先~ 佢係 3A 同我一班所以你唔識佢唔出奇~~

Saw Des Lei!

Facebook 有張唔知5A 定 6A 相,有無你份呀?

你係鄭安國...你細佬鄭安明呀嗎!你細個比車撞傷腳....你忘記我了....我唔係上面幾個~ 以前成日去你屋企....康和里玩果個.....仲係你老豆個夾萬排~龍虎門~, 有印像未.....

這張相第三排左邊第一個的名字好像是叫( 何萬華 )不知我有沒有記錯

呢個叫譚道鈞.... 83'上六A班做我班主任的

終於找到四年級和五年級的旅行班相,相入面的同學仔現在都已經四十幾歲。其中有好多位都同時出現在兩張相上。唔知有無可能有人響內面搵到自己呢? 下4C,地點--烏溪沙:
六年級的旅行相應該貼左響本紀念冊到,努力找尋中。





希望有同學在 這裡,有同學記的話請告知,謝謝



我就88年畢業, 住係16座, 記得細個果時成日去15座天台到玩,因有時沒有上鎖,果度有個鋼架可以玩同埋十六座樓下有好多野食, 仲記得有檔車仔麵, d麵同餸都係五亳子, 前面仲有紅豆冰同波蘿冰都係兩蚊杯only , 仲有一間好似叫文學書局, 所以我到而家都好懷念以前.

我都女子有印像,記起上來都好像是不久的日子,那時我每天上學都吃一碗車仔面才上學,記得好似有三個餸,重好好味,文學書局提起重好深刻,16座那時重好多嘢食,又熱鬧,記得好似有一間賣包的.唔知有無記錯,賣面對面重有間雜貨店.

希望你認到同學啦,可能有好多同學都有呢個希望,唔知佢地知唔知呢度有同學在這裡,我貼埋相都未有人認到.

你就好啦,找到果時的同學,

文學書局,個名好有印象,位置就唔記得啦!

我唔知有無記錯那個文學書局個老細好像是肥肥的,帶個眼鏡的.重成日笑笑口.

you are partly right. Fat uncle is a half-boss whilst the other half is a thin uncle. He always sat cross-leg and held a cigarette between his fingers.

18座冰室是祥記冰室,老細是個肥肥地和一個肥肥的啊婆,最好吃是鮮牛通粉,重有西餅

多謝指正, 有d印象18座同19座一邊樓梯係同用的, 祥記冰室就好似係該樓梯旁, 是嗎? 隔幾間舖好似有一間小型工廠, 小時候好似在該工廠做過外發加工.

不敢,我都是住在那裡才記得的,現在我才記得樓梯口有一間士多店, 然後是祥記冰室,理髪店,織布店(用人手操作的舊式織布機),再有一間士多, 個老叫呀(邱)個子高高大大的, 現在己很老啦, 去年我都見過他, 再過些好像有一間貨倉似的, 也好像是辨公室似的, 印像不太深, 而在中間樓梯下是洗手間, 那時好怕經過那裡, 有些男人在那裡沒有關門, 重好臭, 重有一間早期時是百貨店, 後來生意不好關門了, 另外重有一間每當有節日都有舞獅, 那時成日聽到鑼鼓聲, 而那時有個人好像姓周的經常都在練舞獅, 而中間樓梯出面的空地早時都是好多舖位, 我重得記在17座巴士站成日有個檔口賣生果的潮洲人, 好像姓謝的.

樓梯旁應該係士多.好似叫做佩記!!

佩記士多應在 20 座。

諗左好耐,(裕興)似吾似呀!!!

我之前都有 post 過呢幅圖上來,再 post 多次,大家如果記得當年d位置、足跡,請指教,再 update。



我重記得鄧一龍我常常在那裡看他教功夫

你真好嘢!重記得咁詳細,我就記唔起,有在這裡的街或同學幫手,有圖更好,真係好想睇下當時的圖片

文學書局在十三座,隔離係天龍酒家, 而十四座地下面向聖文德是一間幼稚園

現在全部拾了,英華後改造麗斯,不過都拾了。

你地果張相係邊期架...因爲我都好似見到我自己係度.. 8-9成似我..但係聼你地請講d野又唔似我果期..我都R曬頭... 我就應該82讀完...

咁邊似你呀,等我講個名出來係唔係你咪知囉...

Hi, 大師兄嚟咗la

本人用了一整天閱讀所有threads, 真的感慨萬千,更感動萬分。估唔到只有我常常夢見的景象紛现眼前,真的要感謝各位學友及街坊們。好了,係時候介绍自己嘞。我於1969-1974就讀五邑鄧樹椿小學,家住14座。住我对面的陳麗賢小妹妹居然出现於照片內.........................

我都系 1969-1974哦!我是上午校,吾知你系上午定下午呢!?

Oh, I'm p.m. session. But, nice to meet you!

哦!現在都是同是天崖中年人了。發表多些童年生活大家回味一下啦 !

我 75 年下午班.



好喇,且聽我遲D道來,但我想先講一些事比大家聽....... 十多年前,在慈云山居民被搬空及預備清拆時,我時時在夜深時份,在我居住過的14座、影過我的第9,10,12,21,22,23,24.......等獨自漫步,此些座數須然大多人去樓空,但仍令我勾起無限回憶! 若我經過14座樓下大牌檔群,我會想起'信興'檔,'方記'牛丸(檔主方生曾中過六合彩),'潘記'炒面,'潮洲婆'涼粉,菠law冰,枝記班死飛仔,鄭記雜貨,林記冰室,鄧一龍個仔度打'七星',公仔書檔排隊買'小流氓之雌雄毒龍'............若我漫步20,21,22,23,24時,我會想起'海山冰室'逢下午四出爐雞尾包。 每次before我漫步完畢時,我必上七樓去我的舊居,我會爬高從氣窗往內回望,一幕幕令我回味的片段活現眼前!時間太夜了,我必須離開及返回現實.我只有頹然坐在地上,我忍不住放聲一哭,悲以往的人和事,一概不能復返。
我承認以上行為活像中了邪,了魔,但I don't care; 我一直carry on, 直至14座真正被推倒為止.........
若各位有興趣聽的話,我會樂意繼續講! 我會由我1964年遷入14座起,敘述每一一滴,當然 包括在五邑TSC之快樂小學生活。

就正是在這裡才可以回憶兒時在這裡的一切,過去都祇得回憶,但當回憶起又很有知味,真好像是回到那時的候似的,有時真好想見見到那時的同學,可是現在大家都到了中年了,可幸!還可在這裡看到過一些點滴,老師,同學們,和老地方的照片,時光過得很快,過去的同學,現在都己是中年的了,還幸,這裡有個地方可以回憶,可惜的是可以見到的學校真的很少,希望可以有更多同學可以在這裡相會好啦.

My Sentimental Friend,當然樂意聽你說啦!在這裏的人,全部都是五邑鄧樹樁的同學,而且大多數亦是居於慈雲山,正是又是同學,又是街坊,雖然大家可能年代有些少的距離,但基本上的生活方式大致一樣,在 70~90 年代這時期,是我們成長的階段,我們的下一代又怎體會到當時生活的質數環境,現在只有集体回憶,在這裏把一点一滴的事情,再次組合起來,讓大家回味一下。

當然好有興趣聽啦,我都有試過預備清拆之時,走返去我住的第10座(樂合樓)逛,仲會[裝]返入自己間屋tim。而家只可以發夢時先至做到。 仲有,我從來唔知大排檔係有檔名,可唔可以列出佢地排列位置同檔名呀,以及13.14.15.16座各鋪頭的位置及名字?(如果記得的話)

Yes, they really got names. I can almost remember them all, but, I don't know how to draw it in computer. (May be it is the attribution of our sacred 'Five District...Tang Shu Chun Primary School' for not teaching us. So, let me start. I moved to Blk.14 when I was about three years old. I still remeber my flat was facing North i.e. Blk.16. By that time, Blk. 16 was under construction and had no residences moved in. I started my kindergarten in "贊育" which located just next to "竹園海鮮飯店" in "Fung Wong Village". In 1969 (more or less), I started my primary study in 'Tang Shu Chun' with classes detailed as follows: 1C, 2A, 3A, 4A, 5A & 6B (all p.m. session). When I studied in 1C, I still remember a very sad incident. A classmate of mine called "陳x燕" was attacked by about 12 wild dogs when she was walking pass the rear entrance of '水塘山球場'. Unfortunately, she was biten to dead by the dogs. I saw the incident reported by the newspaper '晶報' (anybody remeber?). We, being a little child, were astounded by the incident very much. Believe it or not, I can still remember the smiling face of "陳x燕". Then, ghost story became hot since her death as many classmates claimed that they heard a girl's crying inside the girl toilet! However, I hoped to meet with her ghost as we had been very good friends. She was so popular for her excellent cartoon drawing., she had drawn one picture to me and I was the only classmate of her who received her gift!

晶報我好有印像,因為我經常幫我老爸落樓下買報紙,這報紙已停了。

Hello zpcwo, I remember my ma said that one child was killed by the dog at the hill when I was little lived in Blk 21, the child's family neighbour in 6/F too. I also known that no any action by her mother when the accident happening, such as no happen anything. I think the said case should be same yours case, due to the girl's surname also is Chan.

Dear Palyau, Thanks for your reading! I do believe you are talking the same case. That pity girl was dead when she was 7! If I have time, I will tell you another killing case in Blk 14. You may make reference to post #364, a drawing of 13,14,15,16 and our school.

還有其它事件,可說來聽聽嗎 ?

好喇,我又講一則舊聞. 話說13座7樓住了十兄弟,其中'九仔'同'十仔'最出名(因為其黑社會背景),尤以'十仔'經常在13座籐舖(重有冇人記得呢?)對出小遊樂場蝦蝦霸霸出哂名. 但十仔有一原則,就係佢唔蝦同座,即13,14座仔. 時為大約1968年,'十仔'當時大約10-14歲.有一日,十仔攬住個肚,步履 跚地從13座樓梯行上七樓屋企,大約在6樓左右,他不支倒下,手放開,原來佢係欖住自己的一堆腸,他的肚被開,頭,身,手,腳滿是刀傷,'十仔'幾下抽搐,就一命嗚呼. 第二天打開報紙,頭條正是報導此宗新聞,得悉'十仔'在行經沙田坳道賣小食的一列舖仔(位於東南西北座對面,而家好似重在,行入舖仔後面是種田的,我相信極小人會記得!)被10多人伏擊,並遭生. 十仔最後死都要死佢住地方. 自此,好多細路都唔敢行經13座7樓'十仔'家門口. 而我重記得'十仔'登晶報頭條果幅眼仍半開的死人相!

我以前隔離屋都有類似情況,又係幾兄弟,又係俾人劈,好彩大修後執返條命。

我地果陣家家都起碼五六個仔女,父母邊理得咁多吖,所以好多做大的壞,跟住啲細佬有樣學樣,所以當時好多小霸王都是親兄弟黎架,都見吾少啦!但好奇怪,果陣時只是男仔出來搞搞震,啲女仔就好乖,反觀現在,除了男仔外,啲女仔好離普,真系冇眼睇啦 !!!

「zpcwo」兄,閣下除了是我小學的學長外,更加是幼稚園的校友,若非您提及「贊育幼稚園」,我根本就記不起我所讀的幼稚園的名字,一想起來就連隨記起「贊育」的校巴和那位和藹慈祥的羅老師。另外我很佩服閣下可以記得這麼多大排檔的名稱。我記得我有一位住十四座姓黃的同學,他屋企就在十五座對開電房旁邊經營了一檔攤,本來是賣生果後來改為賣炒麵、炒河和豬骨粥的熟食檔。敢問「zpcwo」兄是否有印象?

檔炒麵我成日幫襯,個大嬸每朝都度炒炒炒。佢隔離仲有檔賣通粉,可以淨食或加餐肉(以前加餐肉已經當係上餐黎架啦)。

Hi, my good brother. Yes, I knew this 'WONG' family. The fruit stall called 'Kam Kee'. The eldest son WONG XX Nam is a very good friend of mine. God bless you!

既然老哥住十四座,我直覺您應該會認識這家人。您所提及的好朋友應該是我同學的亞哥,記得佢應該是肥仔一個,係檔口的主力之一,反而我個同學好少幫手,剩係見佢成日響「支記」打機。您竟然記得生果檔叫做「金記」..........真勁!

支記茶餐廳? 老闆姓譚.....你識唔識大眼仔?

我都唔知「支記」老板係姓譚,我記得「支記」好像沒有和我差不多年紀的孩童,另外我記得「支記」經營過好多不同行業,尤其以賣觀賞魚和租單車印象最深。 Sorry!「大眼仔」無印象。

支記門口係咪有部好早期既汽水機,跌個紙杯出黎既呢!

「一百分」。 我記得係橙汁味,入完錢趺隻紙杯出黎,再有兩條液體射入隻杯度,一條係濃縮橙汁另一條係疏打水。除左汽水機外,「支記」好似試過賣過軟雪糕和爆穀。

支記姓譚既胡鬚佬你知唔知? 係, 佢玩單車及魚...... 佢地既單車我親戚有份...... 我唔係住8座, 我係住14座......前面有個公園仔.....幼稚園上面沒嗰座..... 一到中秋呢.......成個慈雲山好有氣氛....... 我叫大眼仔......

我住14座7樓,你呢?

海山冰室 好像咁寫 凱珊定海珊呢。大耐都唔好記得。

I am quite sure it was '海山冰室'.

是海山冰室, 不過應該是在27座

各位街坊好!!!我七七年畢業架!住21座!睇完大家冩既野令我好懷念呀!20座間燒臘叫富榮!重有一襠三四點係正心隔離開襠!我地係救世軍門ロ踢波成日比巨鬧!

我住28座, 你樓下救世軍幼稚園逢星期六都有樂團練習, 真係噪死人呀.

甘你記吾記得有一年成個斜坡瀉晒落21座,你屋企實睇到喇!

系呀!我都仲記得,當時見到都幾恐佈架,28 座全橦樓 D 樁柱都見到晒,後來全部居民都搬了去 1~3 座,剛這 3 座落成,到 28 座修輯好,但冇人敢搬去住,房署就賣大包,實行一屋換二屋去吸引居民搬入,住我隔離的鄰居就是這樣搬了去 28 座。

哈哈, 我地就係買大飽個d囉, 我再之前係住19座, 7個人住一間中房, 跟住修復斜坡後, 28座冇人敢住, 我地就膽粗粗申請搬上去, 分配到兩間中房, 成座執過哂, 仲俾我地任揀, 一直住到拆為止..

我一直都住18座5樓407室

28座旁邊有條直落23座大渠,落大雨就好滿水,好多細路玩,你有無份!!!!

當然有啦, 呢條大渠應該係俾清潔工人倒垃圾既, 不過好多細路當滑梯玩, 不過都幾斜, 相當危險, 有次我們兄弟姊妹一起玩, 妹妹只有幾歲大, 我地就好似火車龍咁, 將妹妹夾在中間, 唸住安全啦, 點知滑到一半, 條龍散左, 大家東倒西歪跌到最下面, 妹妹個頭流灑血, 好彩冇傷到頭骨, 從此以後, 唔敢再玩.

小時侯, 我成日攞塊鏡, 將陽光反照在對面21座, 射來射去, 好得意, 我對曾經受過我騷擾的街坊講聲對唔住, 細佬仔唔識世界 (而家已是老餅一名)

考考大家記憶力,有冇人記得11座〝金鳳酒樓〞對面馬路,喺1-3座落成之前係乜嚟?

雖然 1~ 3 座很接近鄧樹椿,但我真想不起之前是係乜嚟,吾知其它人知不知呢!如果冇人記得,有勞大佬幫忙回憶一下啦 !!

好喇, 開估la. 答案係: 戲棚。係用鐵皮搭成而密封的。裹面係放電影的,我重記得好多時係本他咸片,如"七擒七縱七色狼".

係呀, 我記得睇過一次, 係陳寶珠, 呂奇做既 "曼莉,曼莉,我愛妳" 家姐帶住我去睇, 個售票窗好高, 家姐唔夠高買飛, 有個叔叔話幫我地買, 點知d錢一交左俾佢, 佢就即刻跑左, 我地唯有搵後台鐵皮窿損入去, 企係度睇..

啊 !!! 原來戲棚在這位置,我一直還以為在萬年戲院的位置,從前都有去看過戲,當時很細個,都是家姐帶去的,我記得睇過陳寶珠和呂奇的戲,其它就記不起了。

大家重記唔記得"林記冰室"邊,及最好吃係乜?

請問林記冰室係咪係18座?

18座冰室是祥記冰室,老細是個肥肥地和一個肥肥的啊婆,最好吃是鮮牛通粉,重有西餅

好似係57座??????

是在15座。"鄭記"雜貨舖旁。

另一有趣問題,在1972 - 1974 年間 (即4,5,6 年級期間),鄧椿之校花叫乜名? 註:不是我說的,而係師生們一致公認的!

七十年代,畢業旅行一定係烏溪沙,吾知之後去邊既呢?

好耐冇返黎啦!咁多位廿幾座ge朋友,有冇聽過傻佬山呀? 七十年代去烏溪沙咁爽?我83年畢業好似去瀑布公園咋!

報到,小弟都係讀果間,1990年最後一屆畢業的.

19座有偉强士多--紅梅士多--順利服裝--中華藥行 20座有富榮燒味--永發洒鋪-鞋鋪唔得名--永泰隆米鋪--佩記士多

嘩, 好記性!

佩記背面個間鋪有字花賣・細個幫阿媽睇吓開乜・

我細個經常幫我隔離個公公看結果,我當時吾知系也,只是告訴他黑板上面寫甚麼就可以。到十八九歲時我自己都有幫襯買狗仔,二串三,一蚊注,九折,用二元七角就買到,間中都有收獲架。

如果無記錯買9仔好像是20座,字花是18和19座之間的2樓.

你住20座5樓413室?

字花檔姓劉.

想起富榮,每逢新年都會在門外擺陣等舞獅來採青,好熱鬧架,現在沒有此情景看了。

係呀, 當時我住係對面19座, 佢地採青爬上差不多三樓咁高既樁柱上面, 真係好精彩. 而家舞獅已經很少見.

90年畢業生一位, 報到, 好似當年唔知因為打風定落雨, 取消左畢業旅行, 結果要學校禮堂食左d 預備去旅行食物.

留言

  1. 我係73年下午校畢業6B班,我地近呢20年都有同一d同學[仔]聯絡(而家個個都係老餅囉),我地聯絡O既呢班人有巫x和,李x就,楊x國,翁x玲,黃x儀,葉x梨,洪x娟,周x玲,重想搵番多d同學仔,我地當年的班主任係馮文韬,如果有記得o既同學可以add我, sylviakohp@hotmail.com
    基本上我都重記得好多同學仔o既名,例如鄭x安,黃x南,林x章,陳x文,岑x峄,林x元,張x鴻,黃x儒,范x燊,江x芬,彭x深,羅x佩,李x年,梅x華,李x玲~~~~暫時記到咁多先...

    另外個位住18座407,我地可能都相識,因為我住18座527,後尾先至搬左去28座3棲樓梯口個間, 唔sure係咪321, 不過最居然俾我係大埔撞番住我隔離屋個個賣菜婆, 佢重老當益壯居然重認得我, 我地都無見成20年 :P

    回覆刪除
  2. 匿名4/01/2010

    " I started my kindergarten in "贊育" which located just next to "竹園海鮮飯店" in "Fung Wong Village". In 1969 "

    上文的同學,我有這一年的畢業相,唔知你有沒有保留著呢^-^.

    回覆刪除
  3. hi 我於1985-86年,在五粒豆豉蒸雞春學友讀二年級A,不過讀了一年便轉到港島讀書,我好記得miss 朱,因為次次默書唔及格到畀佢打手板,她的白色間尺,打人打到崩晒,很有歲月痕跡!

    回覆刪除
  4. 樂富榮?

    回覆刪除
  5. I am 陳x燕's younger brother lived in block 21 in the past. I am very impressed that she had such a good friend (zpcwo) when she was in P.1. I also missed her, but what you wrote about her family was not fully reflecting the reality. On the day of the incident, her mother was looking for her like a mad woman... For the days after, she was crying at home and locked herself up, not talking to anyone for very long time.
    In her mother's view, she was only temporarily leaving her going to another world. The day will come when they will meet each other...

    回覆刪除
  6. 83上午女班長8/20/2014

    何美玲、邱國棟、郭麗莎、陳麗賢、蘇世波、何锦德、歐陽潔敏、劉佩明、王潔芬跟我同届的,你們仍在這小組裡嗎?我是小五插班生。

    回覆刪除
    回覆
    1. 是連潔湄嗎?

      刪除
    2. 匿名8/08/2022

      估唔到留言六年後才有回覆😅

      刪除
  7. 匿名1/24/2015

    各位好我在七一年六 A 畢業.班主任是姚先生

    回覆刪除
    回覆
    1. 匿名9/22/2015

      Dear classmate, I was also in class 6A of 1971. Our Math teacher was Mr. Leung (Nickname : Leung Fan) and English teacher was Ms. Shing. Time flies and those were the days. I lived in Block 16 which was connected to the school through Block 15. Not sure whether you lived in the same block. Cheers.

      刪除
    2. 匿名9/23/2015

      Correction : Mr. Leung should be teaching Chinese, and Mr. Yiu, the classmaster taught Math

      刪除
    3. 匿名5/02/2022

      我是黄國能
      想找尋舊同學、張振雄
      五邑鄧樹椿小學
      Don't remember too much. Possible from Year 1966 to 1971. Possible Class 6B in Year 1971. Based on the year I born as 1960

      刪除
  8. 匿名6/01/2015

    我是75一76年下午B班畢業,當年我們的班主任是楊國樑。他是教數學。另外在相中的位置是A,D是何sir,Y是校長司徒珍。黃金愛並不是班長,上學期班長是張偉文及鄭x嬋,下學期是張偉文及張德。

    回覆刪除
  9. 匿名6/23/2015

    我88﹣89係度讀左一年小一,班主任係溫先生

    回覆刪除
  10. 各位師兄師姐好,我是87至89師弟

    回覆刪除
  11. Ting Wai Fong10/12/2017

    我姓丁,女生,約1968年畢業,讀下午校,記得6年級時,班上有位男老師姓丁,有位男同學又姓丁,記得體育老師叫陳伯祥,男班長叫沈小林,有冇同班同學呀!!!

    回覆刪除
  12. 刘文标9/03/2018

    我姓刘文标.男1971年屈毕业,6B上午班主任锺爱华,我地已有找到老师及有13同学相聚
    想加入,来电邮whcprint@163.net


    回覆刪除
  13. 可惜部分教職員,包括鄧樹椿捐建人已經仙逝,其中鄧樹椿先生享年101歲(樂善堂堂務報告第十三期誇大享齡,認爲他105歲)

    回覆刪除
  14. 匿名5/02/2022

    我是黄國能
    想找尋舊同學、張振雄
    五邑鄧樹椿小學
    Possible from year 1966 to 1971

    回覆刪除

發佈留言